KATE

KATE

Ni eng mawi tak chhum dum chhah takin a rawn hliah ang maiin kan hringnun duhawm takah chuan khawi lam atang a thlichhiain nge a rawn len tih pawh hriat hauh lohin inhmangaih takte inkarah thil duhawm lo ber chu a lo thleng ta a nih kha!

(A hmasain he thil hi tunhnaia thil thleng atak ngei atawn a ni a, anmahni hi kan lo hria anih pawhin chhiar nuam lo leh rilru natna thlen thei tura comment inpe lo turin kan inngen a, chhiar anawm zawk nan keima tawn angin kan ziak mai ang e.)

Kei hi Mark tiin min ko mai thin a, college ka chawlhsan hnuah MBBS coaching ka kalzawm a, hetah hian a ni ka nun a ka theihnghilh leh tawh loh tur hmeichhia Kate-I ka tawnna chu!

(Kate nen kan chanchin chu atawi zawngin kan sawi mai ang e. )

Class kan kal tan chuan tumah hmelhriat ka neih loh avangin keimahin ka thu mai thin a, nikhat chu Kate chu a rawn tlai avangin thutna dang awl a hmu mai lova, ka bulah chuan arawn thu ve a. Chuta tang chuan hmingte inhre chhoin nitin mai chuan kan inkawm ta thin a, heng hunah hi chuan hlim taka awmin kan hma hunah eng nge thleng dawn tih reng kan hre loa, ngaihtuah pawh ka ngaihtuah phak hek lo.

Kan pahnih chuan kan innelin kan inkawmngeih ta em em a, kan duhzawng a lo inang lehzel bawk nen. Kan pahnih te chuan Westlife hla kan ngaithla dun tiah tiah zel a. Kan inngaina chho tial tial a, kei hmeichhe lawm lo lutuk pawn a rukin ka duh chho ve ta em em a, a thianten min hrilh dan tangin Kate pawh chuan min duh a ni tih ka hre ve ta zel bawk nen.

Kum 2018 July atang vel chuan kan inzui chho ve a, mahse Kate chuan class kalloh zeuh zeuh chu a ching a, ‘Damdawi inah damdawi lak ka ngai” a ti mai thin a. Eng vang nge tih leh eng damdawi nge tih lam ka lo zawt ngai lo. Kan hostel-ah te lo kalin min lo tlawh ve fo thin a, ka damloh pawhin damdawite min lo laksak a, kan hostel-ah chuan min awmpui mai thin.
Hun a kal zel a, tun kum February 2019 khan chhan mumal nei lem loin inthen a rawn ringawt a, a tirah chuan ka hrethiam  lo lutuk, mahse mi ka atangin a bialpa hlui nen an hmuh dun thin thu ka hriat avang chuan hriatthiamna chin ka nei, chumi vang pawh niin ka ngai min kalsan aduh chhan kha! Kei pawh chuan ngaihtuah zui loha then ve mai pawh chu ka tum phah ta a, kan inthen ta reng bawk a ni.

Mahse, class kaldun na-na chu tha takin kan la inbe zui reng tho a, March 25, 2019 a lo nih chuan Shillong an zin dawn tih min hrilh a, ahma a inthen arawt avang khan ngaihdam min rawn dil bawk a. Atuk March 26 zinga class ka kal chu a thiante chuan Kate chu ICU-ah a awm thu min lo hrilh a, mak ka tiin min thawng kher mai. Hrisel lohna neuh neuh anei tih chu ka hria, mahse hetiang ema serious anih erawh ka hre si lo, nilengin engmah ka ti thei lo a, chaw pawh ka ei thei hek lo.

March 27, 2019 zing dar 12:47 anih chuan Phone Call ka dawng a, Kate chu Brain Tumour vangin a thi ta a ni tih thu a thiannu in min rawn hrilh chuan ka kehchhe vek ni mai hian ka hria, engtia awm tur nge tih pawh ka hrethiam lo a, ka tap thei hek lo. Ka phone chu ka hum a, thim zingah ka thu char char ta ringawt a.
Hei hi a ni Kate nena kan chanchin, kan hringnun tawite kan hman dan chu!

A hnua Kate-I nu min hrilh dan chuan 2018 kumtir lam khan Brain Tumour a nei tih an hrechhuak a, Doctor-te chuan beisei a tlem thu leh a rei berah kumkhat vel bak an beisei loh thu a chhungte min hrilh a, chung thu te chu zepin engmah min hrilh duh lo a lo ni, a tirah chuan ka rilru nain Kate chu ka haw em em a, engkim chu amahin a tuar a, hetianga a tawp dawn tih hrereng siin ngatinge rilru naa min siam tiin ka ngaidam thei lo. Min hrilh ve nise chuan tlem talin ka tangkai ve mahna, mahse atan engmah tih theih ka nei si lo.

Mahse tunah chuan ka hrethiam tawh, adam hun chhung arei tawh dawn lo tih hrereng chunga a hun hnuhnung min hmanpui tura kei min thlang hi ka lawm a, amah avangin meizuk te ka sim phah a, a dam chhung kan intawn rei lo teah khan thil tha lo ka tih thin tam tak min simtir a, min kalsan hnu hian kan hma hun neih ang angte a pawimawh zia min zirtir a ni.

Ani ka tawng kha ka lawm a, rei lote chhung pawh nise kum 15 chhung ka zirlaia ka zir zawng zawng aia tha min zirtir a, ka nat hlauin a natna pawh min hrilh phal lova, min lova hmangaih tak em!

“We meet people, we make memories and when they’re gone.. we cherish those memories” – Jc Filan.

(An chanchin ka hriat veleh Mark biain ziah ka dil a, rilru zau tak pua a lo phal avangin ka lawm hle a, heti chin zawng hi ka rawn tarlan theih chu a ni e.)