DI HLUI

DI HLUI
               Eng hla emaw ngaithla tur a ka tih thin nachhan che chu a hla thu te hian i hnen a ka sawi duh zawng zawng an sawi kim vek thin ni a ka hriat vang a ni.

                Ni e, tuma thik buai ngam hauh loh khawp a inhmeh leh in duh em em, kan nun lo la awm turah kan tel dun dawn tih kan rin avang a nunhlui thil vang a inkhing ngai lo kha kan ni a tiraw? Kan in hmangaihna chu a thar tirhin a thlum em em a, a ni telin a thlum zual zel anih tak kha. Ka mi tawn tawh zingah chuan min la hneh ber awm a sin. I chungchang engpawh kha ka hlimpui em em vek a, engtiklai pawhin i nuihmel hmuh ka duh reng thin.

               Nieng mawi tak chum dum chhah takin a rawn hliah ang maiin kan hringnun duhawm takah chuan khawi lam atang a thlichhiain nge a rawn len tih pawh hriat hauh lohin inhmangaih takte pahnih inkarah thil duhawm lo ber chu a lo thleng ta a nih kha.

              A kum tel inhmu lo na na chu ka ngaihtuahna i luah reng bik tawh lova, keima tawkah zirna leh eng emaw tiin ka buai ve em em thin. Ka thinlung Lalpa, englaimah a ka hnar ngai loh chu ka lo theihnghilh tawh emaw ka inti a, khang kan nunhlui te, induh tak a kut inkai riala kan kal thin te, lungchim tak a ka inkuah thin te khan ka ngaihtuahnaah hmun an chang zo tawh lova, hmangaih em em thintu che khan he khawvelah hian i awm ve a ni tih ka lo theihnghilh pek anih kha!

               Mahse, vawi lehkhatah tumlawk sa ni miah lohin i hmel a rawn lang a, hunliam ta a hringnun duhawm ber kan lo hman thin tawh te ngei mai chu a indawt thlap in an rawn inlar ta sup sup a,darthlalang fai tha tak a in en ang maiin mitthla ah an lo lang leh anih kha. Kum tam tak ka hmuh tawh loh khang inuihmel, pianzia leh i rimtui tak te khan hlimna min va pe nasa kher em! Ka lo theihnghilh tawh emaw ka tih te, kan hun hman dun tawh te an lo lan meuh chuan ka lo theihnghilh ngai lo che tih chu Zawlneite sawikher ngai lovin ka hmelah a lang anih pek kha! I nupui neih hnuah pawh nangmahah danglamna ka la hmu lo a,pawmlai nei ni tawh mahla, ka hmangaih ber theihnghilh che kha chu i har a ni.

                   A  dai hlen ta emaw ka lo ti hman a ka hmangaihna che,
                   An thamral ta emaw ka ti thin nunhlui ngaihawm zawng pawh;
                   Mahse i sakhmel ka tawn changin kimten an lo thar leh thin’
                   I khiangawi hnu pawh hi e di hlui nghilh i lo har ka ti

                  Nimin lawk a thil thleng ang mai a chiangin ka nunah hawrawppui a ziak ang maiin a chhiar theih a, engmah reng ka lo la theihnghilh lo, tunah chuan nang chu pawmlai neiin hmunhla takah i awm tawh a, inhmuhnleh chang pawh in hman a hmangaihna thu kan sawi dun thinte kha inhrilh a rem tawh si lo. I hmel ka hmuh rual khan thil tam tak hrilh duh che ka nei a, zawh duh che tam tak ka nei, enge i tih thin a, min ngai ve ngai em? tihte thleng pawhin sawi tur tam tak ka nei, mahse lungkim lo tak chung khan  'I lo dam thin maw?' tih chauh ka zawt thei che anih kha. Thinlung tak mai a Ka hmangaih che ti thin in hmelhriat pangai ang mai a han biak che kha a va har tehlul em! Mahse, khuavel dan a ziak loh dan awm chuan ka thinlung chhungril ber a khatliam hmangaihna thuchah chu chhakchhuak turin min phalsak si lo.

                  Thlangkhuandimin kardan ah kan leng ta si a,
                  Tawnchang ni pawhin biahthu hrilh a rem tawh lo;
                  I lo dam thin maw? Aw di hlui, aw di hlui
                  Tih chauh hi ka zawt gam a che, lungkimlo em em chung si hian e,
                  Hei chauh hi ka zawt thin ang che.                  

Tlanghriat khawp a hmangaihna kan lantir lai khan kan inthen ang tih ka ring pha lo a, ngaihtuah pawh ka ngaihtuah ngai hek lo. Mahse, inti leh teh ang, ka hringnunah hian mahse tih hian hmun a chang lian tlat alawm le. Khuarel thikthu chhiatna avang zawkin kan inthen a lo tul ta si tiraw? Fanau maltluan chawi a hmalam hun duhthusam tinreng suangtuahna te chu Romei ang maiin an thamral a, ka lo theihnghilh ta emaw ka tih, ka hriatreng si te, nangmah ngai em em a ka awm thin te chu tuma hriatpui loh a aruk a ka tuar a ngai dawn tih ka hriat hian hringnun hi a rei ka tiin hman zel ka huphurh takzet a sin.

                 Lenlai partlan a kan hlimlai khan inthen leh hian kan mawi lo,
                 Mahse chantawk khuarel ang zawkin kan lo inthen ta maw?
                 Nunhlui leh nangngaih a ruk hlir a ka lo tuar dai tawh tur hi,
                 Ka dawn khawl changin lei hringnun hi keizawng a sei ka ti.

Rilru inhmuhloh avangte, intih thiam lohna avang a inthen te meuh pawhin an nunhlui te dawn kirin an ngai em em thin a ni a, induh ngawih ngawih chung si a, thenna nunrawng tak tuartu tan phei chuan a va na zual dawn em! Duhtak a kan pawm thin te , kan ta emaw kan tih thin te chu kan ta an ni silo. Engpawh nise, inhmuh leh chang te awmin, kan nunhlui ngaih hunte lo awm thin mahse thleng lo ang mai a tuar tum zawk ila, kumkhua atan intawng leh tawh lo tur na na chu kan pwmlai te tan rinawm i tum zawk ang.

              Lunglai hal vang a inthen mah hian suihlunglen thar ni an nei,
                Duhte a tanglai a pawm tawh hnu ngilhni ahar an ti;
               Thinlai thar chang nite tam mahse damte a tuar tum zawkin,
               Kumtluangin e pawmlai di tawnah rinawm i tum zawk ang.

19th April 2015 07:47pm a ka ziah ania a phuahtu ka dil lo min hrethiam em ang chu rilru ah lang tlat a hehe